အမှတ်တမဲ့စကားလုံးလေးများ

ခံစားရတာများရှိတဲ့အခါ မွန်းကြပ်တာတွေကို....

မေ့လိုက်တာအကောင်းဆုံးပါပဲ။

နူးညံ့သိမ်မွေ့တဲ့ရင်ခုန်နှုန်းတွေကို မှတ်မှတ်ရရတမ်းတနေဆဲမှာဆိုရင်........

အကောင်းဆုံးသောအသက်ရှင်မှုဘ၀တခုပေါ့။

အကြင်နာစကားလုံးလေးများထွက်ကျလာမလားလို့မျှော်လင့်နေတာများသိရင်....

အချိန်တိုင်း စက္ကန့်တိုင်းမှာရှိတယ် ကဗျာမဆန်ခြင်းလို့ထင်ထားခြင်းတခုဟာ အကောင်းဆုံးကဗျာဆန်မှုတခုဖြစ်နေပြန်ရော။

တသက်တာခံစားချက်အားလုံးကို အပိုင်စားပေးထားတာကို နားလည်ပေးထားတယ်ဆိုရင်....

နားလည်ထားခြင်းဆိုတဲ့ဘာသာဗေဒဟာ အပြန်အလှန်ငြင်းခုန်ဖို့အတွက် နေရာတွေ အချိန်တွေ ပေးမထားလေဘူး။

သဘာဝတရားရဲ့ တုံ့ပြန်မှုတွေက နည်းနည်းလေး ဆိုးရွားလာတဲ့အခါ....

သဘာဝတရားကြီးကိုက အကောင်းနဲ့အဆိုး ချီးမြှင့်ထားလေတော့ ညှိနှိုင်းနားလည်ခြင်းကသာ အောင်မြင်စွာနဲ့ကျော်လွှားနိုင်ပေလိမ့်မယ်။

မိုးပေါ်က တိမ်သားပမာ တလွင့်လွင့်မျောတတ်တဲ့ ဘဝတစ်ခုက အခြေအနေမပေးသေးတဲ့အခါ.....

အားလုံးသောလူသားတွေက ဘာမှမတည်မြဲကြပါဘူး၊ တိမ်စိုင်တွေပေါ်မှာ ငြိမ်းချမ်းခြင်းတွေသာ တည်ဆောက်ရအောင်။

တိမ်စိုင်တွေနဲ့တူတဲ့ ငြိမ်းချမ်းသောဘဝအခြေအနေကနေ မိုးသားအေးအေးလေးရွာသွန်းခွင့်ရမယ်ဆိုရင်.....

လှပတဲ့ မြေကမ္ဘာပေါ်မှာ စိမ်းလန်းခြင်းတွေထပ်ပြီး မွေးဖွားကြရုံပေါ့။

သာယာငြိမ်းချမ်းမှုကို မျှော်လင့်ဖန်တီးကြမယ် ဆိုတော့.............

အားလုံးက ငြိမ်းချမ်းခြင်းကိုတောင့်တကြတာပါ။ တို့ (၂) ဦးငြိမ်းချမ်းခြင်းဟာ ကမ္ဘာကြီး ငြိမ်းချမ်းခြင်းပဲပေါ့။

"Words" is Created by Ni Ni Win & "Words" is Created by Thiha Maung Maung

ချစ်မိတဲ့ တနင်္ဂနွေ

အထီးကျန်နေ့ရက်များစွာနောက်မှာ
ခိုင်မာတဲ့ တည်တံ့မှုမရှိနိုင်တဲ့နောက်
သံစဉ်မဲ့တေးသွားများ အဓိပ္ပါယ်ရှိရှိဖန်တီးခွင့်ကို
ရနံ့သစ်တည်ရာ ကိုယ်မျှော်လင့်တဲ့နယ်မြေမှာ
ခြေချတေးသီကာ
သံစဉ်ကောက်ကြောင်း တေးသွားများစွာနဲ့
နူးညံ့နေတာ
အစပြုခဲ့ ချစ်မိတဲ့ဒီတနင်္ဂနွေမှာ...

အခါမဲ့ လွှမ်းမိုးခြင်း

ရာသီစက်ဝန်း
နာရီစက်သံ
နေ့ ည မမြဲ
မတည်သောပြောင်းလဲခြင်းနောက်
တကောက်ကောက်မလိုက်သော ဥာဉ်.....။

ဆန့်ကျင်ရာ လမ်း
မဖြေသာ ပြေရာပြောမှ
မကြင်နာ မညှာတာတဲ့
ခင်တွယ်ရာ တည်ငြိမ်ခြင်းလေးက
မမှောင့်တောင် မပျောက်ဖို့ လိုမယ့် အစဉ်.....။

ပန်းနဲ့ဝတ်ရည်
ရေကန်နဲ့ကြာ
တွဲမြဲ မခွဲအစဉ်မို့
မိုး နွေ ဆောင်း ပြောင်းစေ
ထာဝရ ရင်မှာ ရာဇပုလ္လင်အရိုက်အရာ က ကိုယ့်ဘဝပိုင်ရှင်.......။

.

The Wishes for our loving PLANET

.

ချစ်ခြင်းတရားနဲ့ စစ်

ချစ်ခြင်းတွေ အပြည့်အ၀ဖြည့်စွမ်းပေးနေတဲ့ ဟောဒီ အပြာရောင် ဂြိုဟ်ကမ္ဘာကြီးပေါ်မှာမှ
စစ်မက်အပူမီးတွေ လောင်မြိုက်နေရတဲ့အတွက် ကျွန်တော်တို့စိတ်မကောင်းပါဘူး။
ဝဋ်ကြွေးအဟောင်းတွေဆပ်ပြီး ၀ဋ်ကြွေးအသစ်တွေ ယူနေကြတဲ့ သံသရာတွေကြားမှ
ချစ်ခြင်းတရားသက်သက်နဲ့ အသက်ရှင်သန် နေလိုသူတွေဟာ တဖြုတ်ဖြုတ်နဲ့ သေဆုံးနေကြရ . . .
ဘ၀မှာ သောက်ရေသန့်သန့်တခွက်၊ ချစ်သူဆီက အေးမြတဲ့အနမ်းပွင့်တွေနဲ့ သစ်ရိပ်အေးမြမြ . . .
ကျွန်တော်တောင့်တမိခဲ့သလို အိုမာခရမ်လည်း တောင့်တခဲ့ဖူးပါတယ်။ ကျွန်တော်တို့မှာ မပြည့်စုံခြင်းတွေနဲ့
မတည်မြဲခြင်းတွေကို ခါးသီးစွာနဲ့ ဆုပ်ကိုင်လို့ထားတယ်။ အဲဒီအခိုက် အဲဒီပမာဏ
မြူတမှုန်စာ အကွာအဝေး အချိန်ခဏလေးအတွင်းမှာဖြင့် ချစ်ခြင်းတွေနဲ့ ငြိမ်းချမ်းစွာ နေလိုလှပါတယ်။
အိပ်ရာနိုးစ ချစ်သူရဲ့ အပြစ်ကင်းတဲ့ မျက်ဝန်းလေးကိုကြည့်နေရတာကိုက နိဗ္ဗာန်ဘုံတမျှပါပဲ။
ကျွန်တော် တနေ့ခင်းလုံး လောင်မြိုက်ပစ်မယ့် စွမ်းအင်ဒြပ်ထုတွေအတွက် မနက်ခင်း ချစ်သူဆီက
အနမ်းပွင့်တွေနဲ့ နှုတ်ဆက်ခြင်း ဆီကပဲယူခဲ့ပါတယ်။ ဘ၀မှာ ချစ်နေလို့လည်းမပြီးဘူးလို့ သူငယ်ချင်းတွေက
ပြောပါတယ်။ ဘ၀မှာ ချစ်နေဖို့ပဲ လိုအပ်ကြောင်း ကျွန်တော်က ပြောပါတယ်။ ချစ်ခြင်းကင်းမဲ့နေရင်
Ozzy Osbourne ဖြစ်မလာပါဘူး၊ Andy Warhol ဖြစ်မလာပါဘူး၊ Tonny Iommi ဖြစ်မလာပါဘူး၊
John F Kennedy ဖြစ်မလာပါဘူး။ အိုက်စင်ဟောင်းဝါးဟာ ချစ်ခြင်းတွေသာမရှိခဲ့ရင် ဟစ်တလာလိုပဲ
ဇာတ်သိမ်းမှာပါ။ ဂျွန်လင်နွန်က ယိုကိုအိုနိုကိုချစ်တယ်။ Imagine သီချင်းလေးဖြစ်လာခဲ့တယ်။
မတ်ဆုတဆုအိုယားမားက သူ့ရဲ့ ဘုရားပေးထားတဲ့ လက်သီးတွေကိုချစ်တယ်။ ဘီလ်ဂိတ်က
Microsoft Window ကိုချစ်တယ်။ ကျွန်တော်က ကျွန်တော့်ချစ်သူကို ချစ်တယ်။
ကျွန်တော်တို့ ဂြိုဟ်ကမ္ဘာကြီးက အင်မတန်မှ သာယာလှပပါတယ်။ အဲဒီသာယာလှပမှုကြောင့်ပဲ
စစ်မက်တွေလောင်မြိုက်ခဲ့ရ။ အဲဒီစစ်မီးတွေက ဗုဒ္ဓတရားတော်အရ ၀ဋ်ကြွေးတွေကို ပေးဆပ်နေရခြင်းတခုပါပဲ။
စစ်မက်တွေကြောင့် ဒုက္ခရောက်နေကြသူတွေထဲမှာ ချစ်တဲ့သူနဲ့ ကွေကွင်းရတဲ့ ဒုက္ခတရားကို စာနာ
နားလည်မိပါတယ်။ ဒါပေမယ့် သံသရာဟာ စက်ဝိုင်းတခုပါ။ တနေရာထဲမှာ ရပ်မနေပါဘူး။
အမုန်းတရား မုန်တိုင်းတွေ ပြီးရင် ချစ်ခြင်းတွေနဲ့ ပြာလွင်တောက်ပနေတဲ့ ကောင်းကင်ကြီးကို
တွေ့ရလိမ့်မယ်။ ချစ်ခြင်းတရားရဲ့ ငြိမ်းချမ်းအေးမြတဲ့ ခွန်အားတွေ ကမ္ဘာမှာများလာရင်တော့ စစ်မီးတွေ
ငြိမ်းသွားစေမှာ အမှန်ပါ ...။
...

တည်တံ့တဲ့တံတိုင်း

မော့်ကြည့်လိုက်တဲ့အချိန်တိုင်း
ကိုယ့်မြင်ကွင်းဟင်းလင်းပြင်မှာ
စိုးရိမ်တကြီး နူးညံ့တဲ့အကြင်နာများစွာနဲ့
အုံ့မိုးပေးနေတဲ့ သူ............။

ခံစားရချက်များစွာတို့အောက်
ရင်နင့်နာကျင်စွာ ငုံ့စိုက်လိုက်တဲ့အခါတိုင်း
ကိုယ့်ဘေးနံပါး ကပ်မှီစေရာ
နွေးထွေးမှုအပြည့် ချမ်းမြေ့ဖွယ်အယုအယတွေနဲ့
ပွေ့ပိုက်ဖက်တွယ်ခွင့်ပေးနေတဲ့ သူ..............။

ပေါက်ကွဲမိတဲ့ အခါခပ်သိမ်းတို့နောက်
ပူလောင်လွန်းလှသော ရတက်မီးတို့ရဲ့စေစားရာနောက်
တုန်ရီဝေဝါး ညည်းတွားမိတဲ့အခါတိုင်း
လေးနက်တဲ့ခွန်အားများကို ပြယုဂ်တစ်ခုအနေနဲ့
ခိုင်မြဲစွာဆုပ်ကိုင်ထားတဲ့ လက်နှစ်ဘက်ကို
ပိုင်ဆိုင်ခွင့်ပေးထားတဲ့ သူ............။

ူဥတုရာသီပြောင်းလဲခြင်းနောက်
ကံရာသီစက်ဝိုင်းပြောင်းလဲခြင်းနောက်
လောကဓံပြောင်းလဲခြင်းနောက်
မပြောင်းမလဲတည်တံ့တဲ့ ကိုယ့်အတွက် တံတိုင်း
ဝမ်းသာကြည်နူး ဂုဏ်ယူမိစေတဲ့ သူ...........။


...

စိတ်စေရာ

အမည်နာမဝိသေသတစ်ခု နဲ့ အတူ
လောကဟင်းလင်းပြင်ကြီးထဲမှာ တွယ်ရာမဲ့မဖြစ်စေချင်တဲ့ ဆန္ဒတစ်စုံက
မျှော်လင့်ခြင်းများစွာ တည်ဆောက်မိတဲ့အထိ
အင်အားဖြစ်စေခဲ့တယ်....။

မြူခိုးတိမ်ပမာ ဖုံးကွယ်ထားတာ အတ္တတစ်ခုသာ ဖြစ်ပေမယ့်
နူးညံ့ညင်သာတဲ့ ဝေဒနာခံစားချက်လေးကို ဆုပ်ကိုင်မိလိုက်ချိန်အတွင်း
တိုးတိတ်ငြိမ်သက်လှစွာသော ချစ်ခြင်းတရားကို လက်ခံစုံမက်မိတဲ့အထိ
သိမ်မွေ့ခံစားစေခဲ့တယ်...။



...

အရုဏ်ဦး အလင်းသစ်အစ

မျှော်လင့်မိတဲ့
လင်းရောင်ခြည်အစမှာ
ငေးမောတဲ့မျက်ဝန်းအစုံက
ဟိုးအဝေးဆီမှာ
ရင်းနှီးမှုတစုံတရာနဲ့ပေါ့

အကြင်နာစကား
သံစဉ်တိတ်ကြားလည်း
နားမစွင့်လည်း ကြားနေမိရဲ့လေ

ရောင်နီပျို့လေမလားရယ်လို့
တွေဝေနေမယ်ဆိုတာ
ကိုယ်ခံစားလိုက်ရတဲ့အခါ
ရင်မှာက
နားလည်မှုတပွေ့တပိုက်ရယ်နဲ့ပေါ့

ကဗျာတွေအားလုံး
သံစဉ်တွေအားလုံးရဲ့
နောက်ကွယ်က
မပြောင်းလဲတဲ့ ချစ်ခြင်းတရားကို
ဖန်တီးမှုမရှိ သဘာဝလက်ဆောင်အဖြစ်
ကိုယ်ဖြည့်ဆည်းပေးမိနေတယ်

အံ့သြကြလေမလားရယ်လို့
မတွေးမိဘူး
နူးညံ့တဲ့ခံစားချက်တွေနဲ့အတူ
ထာဝရဖြစ်တည်နေမယ့်
ကိုယ့်ရဲ့ ချစ်ခြင်းမေတ္တာတရားတွေအားလုံး
အရုဏ်သစ်စ နေ့ခင်းလင်းရောင်ခြည်လို
သန့်ရှင်းတည်မြဲနေမယ် ...။

နံနက်ခင်းရဲ့အပြာရောင်

ဘဝမှာ
ချစ်ခြင်းမေတ္တာတရားက အရေးကြီးပါတယ်။
အိပ်ရာနိုးစအတွေးသစ်တွေနဲ့
လတ်ဆတ်ပျိုမြစ်နေတဲ့
သဘာဝတရားကြီးရဲ့ ရင်ကိုလှုပ်နှိုးလိုက်တယ်

သောက်ပြီးတဲ့ကော်ဖီတစ်ခွက်ပေါ်မှာ
ညကအိပ်မက်ဆိုးရုပ်ကြွင်းတွေ ချန်ထားရစ်ခဲ့တယ်

ကျွန်တော်က ကဗျာတွေကိုချစ်တယ်
ကျွန်တော့်ချစ်သူကလည်း ကဗျာတွေကိုချစ်တယ်

ကျွန်တော်ရော
ကျွန်တော့်ချစ်သူရော
လွတ်လပ်မှုရဲ့ အပြာရောင်တွေကို ချစ်တယ်

ကျွန်တော်ရော
ကျွန်တော့်ချစ်သူရော
ရဲရင့်တဲ့ အနီရောင်ပန်းသီးတွေကို ချစ်တယ်

ကန်ရေပြင်ကို တိုက်ခတ်လာတဲ့
လေနုအေးရဲ့ အလျင်လောက်နဲ့
ကျွန်တော်တို့ နှစ်ဦးရဲ့ အနမ်းတွေဝေဆာခဲ့ပုံ

အဲဒီအချိန်က
ကမ္ဘာကြီးဟာလည်း
ငြိမ်းချမ်းလို့
စစ်မက်တွေကင်းလို့
ကောင်းကင်ကလည်း
ကြည်စင်ပြာလွင်လို့
ဂျွန်လင်နွန်ရဲ့
အချစ်သစ်ပင်ကလည်း
မနက်ခင်းရဲ့ အေးမြခြင်းထဲမှာ
အဓိပ္ပါယ်ပြည့် မျှော်လင့်ခြင်းတွေနဲ့
ခက်လက်ဝေဆာ စိမ်းမြနေလို့လေ...။